Oddvitar í Reykjavík á málþingi stúdenta í Háskóla Íslands - upptökur

Eins og sjá má á myndbandinu í viðhengdri hefur kallinn átt hressari daga, var með bullandi flensu og hálsbólgu þarna og hálf pungsveittur, þið fyrirgefið mér vonandi orðbragðið og sjálfsvorkunina

Koma sæmilega á framfæri málefnunum okkar og það er jú fyrir mestu.

Það háir þessari kosningabaráttu málefnafæð - það er skortur á umræðu um málefnin OG HVERNIG framboðin ætli að standa undir yfirlýsingum sínum. Ég hvet þig til að kíkja á heimasíðu REYKJAVÍKURFRAMBOÐSINS og skoða þar vel útfærða stefnuskrá sem byggir á LAUSNUM um hvernig megi fjármagna borgina og forðast frekari kreppu á komandi kjörtímabili.

Við neitum einfaldlega að leggjast bara á bakið og gefast upp af því að það er erfitt ástand í efnahagsmálunum. Það eru til lausnir - það er okkar að sækja fram og nýta þær til þess að verja borgarbúa gegn frekari álögum og niðurskurði.

Kíktu endilega líka á bloggið hans Sölva á Skjá 1, hér má sjá upptöku frá Spjallinu í kvöld þar sem að málefnin okkar komust ágætlega fram sum hver.

Stöndum saman borgarbúar og berjumst - það eru til lausnir - sækjum þær!!  Það er þitt að kjósa hvaða leið þú vilt fara - þitt er valið.

Uppgjöf eða sókn?

Oddvitar í Reykjavík - framsögur á fundi í Háskóla Íslands

REYKJAVÍKURFRAMBOÐIÐ og stúdentar í Vatnsmýrinni

Þetta verður áhugaverður fundur á morgun með stúdentum á málþingi Vöku.

Málefni stúdenta tengjast okkur í REYKJAVÍKURFRAMBOÐINU mjög náið þar sem að við sjáum endurskipulagningu Vatnsmýrarsvæðisins og nýtingu verðmætanna þar, sem helstu lausn gegn frekari niðurskurði og skattahækkunum á borgarbúa á komandi árum. Það eru miklar þrengingar og viðbúið að ekki verði hjá því komist að nýta eignir borgarinnar til að skapa tekjur. Verðmætin í Vatnsmýrinni standa undir því að í fyrsta lagi að koma í veg fyrir frekari niðurskurð í velferðarkerfinu sem og til að auka þjónustu og standa undir áframhaldandi uppbyggingu þar sem þörfin er mest.
 
Þetta tengist málefnum stúdenta í Háskóla Íslands og Háskólanum í Reykjavík síðan náið, sérstaklega þegar horft er til skipulags svæðisins með í huga fjölgun minni og meðalstórra íbúða til bæði kaups og leigu. Það kemur skýrt fram í úttektum sem gerðar hafa verið að það er mikil þörf á minni og meðalstórum leiguíbúðum miðsvæðis og þá sérstaklega til þess að þjónusta þann fjölda stúdenta sem að sækja nám beggja vegna svæðisins.
Hugmyndir okkar um skipulag snúa að því að skapa þarna framlengingu á miðbænum með menningar- og fjölskyldulíf í huga þar sem að stúdentar munu skipa stóran sess.

Nýtt skipulag fyrir fallega byggð í Vatnsmýrinni sem að sameinar fallegt framhald af miðborginni og háskólahverfi með Háskóla Íslands öðrum megin og Háskólann í Reykjavík hinum megin er verðugt markmið. Gaman væri líka að sjá Listaháskólann inni á skipulagi þarna líka. Þetta svæði er mun meira miðsvæðis upp á samgöngur að gera heldur en Laugavegurinn.

Oddvitar svara stúdentum

REYKJAVÍKURFRAMBOÐIÐ leggur fram lausn til örvunar framkvæmda

Stefnumálin okkar má sjá meðal annars hér: http://reykjavikurframbodid.is

Kreppa, erfiðleikar og erfitt lyndi þarf ekki að vera lögmál til framtíðar. Það er okkar að snúa vörn í sókn. Tækifærin eru til staðar þrátt fyrir erfitt ástand.

Við viljum nýta eignir borgarinnar til þess að koma framkvæmdum af stað aftur. Enn harðari niðurskurður og skattahækkanir þurfa ekki að vera óhjákvæmileg. Með innspýtingu fjármagns inn í borgarsjóð má skapa hér mýmörg tækifæri í byggingar- og viðhaldsverkefnum. Útrýming atvinnuleysis í borginni er eitt helsta hagsmunamál borgarbúa. 11% atvinnuleysi kostar borgarsjóð um 11 milljarða á ári. 11 MILLJARÐA!! Það segir sig sjálft að það er kostnaður sem verður að útrýma, að ekki sé talað um félagslega og tilfinningalega skaðann sem atvinnuleysið veldur.

Hvort vilt þú? Frekari álögur eða að nýta eignir borgarinnar og skapa atvinnu og ný tækifæri?

 

 

52 fasteignir á 1.360 milljónir

X-E REYKJAVÍKURFRAMBOÐIÐ dreifir kosningabæklingnum sínum um helgina - bætt velferðarkerfi og atvinnusköpun okkar helstu markmið

Vonandi að við fáum að hitta sem flest ykkar á ferð okkar um borgina um helgina. Við erum svo heppin að hafa lítið fé til kynningar og tökum því þann pól í hæðina að dreifa bæklingnum okkar sjálf. Bið ykkur endilega að taka vel á móti fólkinu okkar ef þið rekist á það á förnum vegi.

Jafnvel að nota tækifærið og spyrja það svolítið nánar út í hvað vil viljum standa fyrir.

Andstæðingar okkar sem og fjölmiðlar vilja spyrða því við okkur að við séum "flugvallarframboðið" og reyna að láta líta út fyrir að það sé okkar eina mál. Eins heyri ég það sagt um allt að við ætlum bara að leysa kreppuna með lóðasölu "eins og það sé hægt núna?".

Það er að sjálfsögðu ekki svo að flugvallarmálið sé það eina sem að við berjumst fyrir, það er langt frá því. Það er hins vegar eitt af málunum okkar og draumur okkar um framtíðar alvöru miðborg í höfuðborg landsmanna.

Meginmálefnin okkar fyrstu misserin munu hins vegar snúa að velferðar málum og atvinnusköpun. Það er búið að skerða gríðarlega í velferðarkerfinu og í grunnþjónustu og allt of langt gengið. Skólar eru orðnir svo fjársveltir að þar er sumstaðar ekki eftir fjármagn til þess að prenta út námsgögn fyrir börnin eða jafnvel að skipta um perur í skjávörpum þegar þær fara. Að sjálfsögðu gengur slík naumhyggja bara einfaldlega ekki upp. Það verður að vera hægt að halda uppi lágmarksþjónustu hérna - það er til lítils að senda börnin í skólann ef þjónustan þar verður ekki til staðar.

Það sama á við um atvinnuleysið - það er stærsta vandamál borgarinnar í dag. 11% atvinnuleysi kostar borgina um 11 milljarða á ári. 11 milljarða! Það er því ljóst að það er lang mikilvægasta málið til að leysa á komandi kjörtímabili.

Það verður ekki leyst með árangursríkum hætti með meiri niðurskurði. Það verður ekki leyst með hækkun útsvars á borgarbúa sem að hafa ekkert til skiptanna nú þegar. 40% fjölskyldna eru nú þegar langt í frá að ná endum saman. Á þetta fólk er ekki meira leggjandi.

ÞESS VEGNA horfum við til Vatnsmýrarinnar sem lausnar. Við viljum skipuleggja þar íbúabyggð af ýmsum ástæðum. Mín ástæða er sú að þetta er flottasta byggingarland á landinu. Þetta er því verðmætasta einstaka eign borgarinnar í dag um .leið og nýtt skipulag liggur fyrir.

Með vægri veðsetningu á landinu í Vatnsmýri getum við lagt um 7 milljarða á ári til viðbótar inn í rekstur borgarinnar. Þeir fjármunir meira en duga til þess að bakfæra þann niðurskurð sem orðið hefur undanfarin misseri, til þess að bæta við velferðarþjónustuna OG til þess að setja kraft í mannaflsfrekar framkvæmdir víðs vegar um borgina.

Margir reyna að láta svo líta út sem að við séum að tala í töfralausnum. Það var ekki markmið okkar. Við viljum hins vegar tala í lausnum. Í stað þess að blaðra aðeins innantómt um hvað við viljum gera, eins og fjórflokksfulltrúar margir hverjir gera þessi dægrin, viljum við einnig tala skýrt um hvernig við ætlum okkur að fjármagna það.

Er það ekki eðlileg krafa?

Bæklingurinn okkar er hérna með sem viðhengd skrá. Þér er að sjálfsögðu velkomið að prenta hann út og dreifa áfram

Vopnlausir stjórnmálaflokkar

Skrár tengdar þessari bloggfærslu:

• Kosningabæklingur REYKJAVÍKURFRAMBOÐSINS

REYKJAVÍKURFRAMBOÐIÐ að grínast?

Nei, við stöndum einfaldlega frammi fyrir aðeins þremur praktískum valkostum í komandi sveitarstjórnarkosningum. Fjórflokksmeðlimir reyna að sjálfsögðu að láta þetta hljóma eins og kjánaskap enda kemur það þeim afar illa að fram komi framboð sem eru óháð þeirra sérhagsmunum.

Valkostirnir sem að við stöndum frammi fyrir á kjördag eru einfaldlega:

1. Skattahækkanir - að hækka álögur á borgarbúa enn frekar með sköttum og gjaldskrárhækkunum.
2. Niðurskurður - að skera enn meira niður í grunnþjónustunni, sem þegar hefur verið skert mikið þrátt fyrir yfirlýsingar borgarfulltrúa um annað
3. Selja eignir - að nýta eignir borgarinnar til þess að verja borgarbúa fyrir enn frekari þrengingum.

Hvort vilt þú lesandi góður taka á þig meiri birgðar og/eða niðurskurð eða nýta sameiginlegar eignir borgarbúa til þess að skapa verðmæti meðan að versta kreppan skellur yfir?

Fyrir mér snýst praktíska spurningin  fyrst og fremst um þessa þrjá kosti.

Huglæga hlið málsins er síðan einfaldlega þannig fyrir mér að eftir algera óstjórn og mesta óstöðugleika í borgarstjórn og rekstri sem að við höfum nokkurn tímann upplifað í borginni, get ég bara með engu móti fengið af mér að kjósa sama fólkið áfram og lék þar stóru hlutverkin. Þess vegna meðal annars varð REYKJAVÍKURFRAMBOÐIÐ til. Við erum hópur fólks sem að treystir einfaldlega ekki fjórflokks fulltrúunum til þess að verja og berjast fyrir hagsmunum okkar fram yfir þeirra eigin hagsmuni og flokkanna þeirra.

Þess vegna er valið kannski enn einfaldara fyrir þessar kosningar, kannski snýst valið bara um tvo valkosti við stjórnleysi fjórflokksins. Grín eða alvöru.

Okkur hjá REYKJAVÍKURFRAMBOÐINU er full alvara í því að ætla að beita okkur af hörku fyrir því að verja hagsmuni borgarbúa, að létta sérstaklega á með þeim sem verst standa og bakfæra aftur þann niðurskurð sem orðið hefur á grunnþjónustunni undanfarin misseri.

Við treystum okkur til þess vegna þess að við veljum kost 3 hér að ofan. Við munum nýta eign borgarinnar í Vatnsmýrinni til þess að standa undir því að hér verði rekin borg með velferðarkerfi og grunnþjónustu sem sómi er að.

Vatnsmýrin „í gíslingu" fjórflokksins í Reykjavík

REYKJAVÍKURFRAMBOÐIÐ talar í lausnum - vill fólk áframhaldandi innihaldsrýra frasa?

Er það virkilega svo að við látum glepjast af innihaldsrýrum frösum áfram eftir allt sem á undan er gengið? Hvað þýðir árangursrík hagræðing? Jú, mikill niðurskurður í þjónustu við íbúa borgarinnar.

Loforð um áframhaldandi árangursríka hagræðingu ættu að hræða okkur og vekja til umhugsunar, ekki að virka sem einhverskonar hvatning í pólitískum fréttum auglýsingum fyrir fjórflokkinn.

Það ætti að vera eðlileg lágmarkskrafa að við sem áhugafólk um stjórnmál fáum fram um það upplýsingar hvernig nákvæmlega eigi að standa undir kostnaðinum við rekstur borgarinnar. Það hefur enginn fjórflokksins gert að VG undanskildum, sem hafa komið því skýrt á framfæri að þeir vilji hækka skatta.

Sjálfstæðisflokkurinn ætlar að skera áfram niður(afsakið) "hagræða árangursríkt" áfram. Samfylkingin ætlar að taka lán sem þarf að greiða aftur með skattahækkunum eftir 2-3 ár. Framsókn ætlar að?? Tja, ég svei mér þá er ekki viss. Kannski þarf að spyrja Eykt að því.REYKJAVÍKURFRAMBOÐIÐ vill tala í lausnum.

Fáum við til þess nægjanlegt fylgi munum við:

• Verja velferðarkerfið
• Taka aftur ósæmilegan niðurskurð í grunnþjónustunni undanfarin ár
• Útrýma biðröðum eftir mat og auka stuðning við þá verst sett
• Bæta verulega skipulag borgarinnar og samgöngur
• Koma atvinnumálum í borginni á fulla ferð með fjárstuðningi við nýframkvæmdir (til dæmis við skóla og hjá íþróttafélögum), viðhald og nýsköpun með breyttri forgangsröðun í aðgerðaráætlun borgarinnar þannig að hún henti sem flestum Reykvíkingum
• Stuðla að því með íbúum og íbúasamtökum að komið verði á fót þriðja stjórnsýslustiginu þar sem völd eru færð frá bákninu til íbúa hverfanna. Að kosið verði til slíkra ráða meðal íbúa hverfanna og hafi þau rétt til sjálfstæðrar ákvarðanatöku um innri málefni hverfis og eigin tekjugrunn til þess að standa undir framkvæmdum.

Allt ÁN skattahækkana - því að við ætlum okkur að nýta eignir borgarinnar til þess að verja íbúa hennar.

Í Vatnsmýrinni búa mikil verðmæti, a.m.k. 70 milljarða eign sem borgin á. Eign sem að okkur ber skylda til þess að nýta á erfiðleika tímum. Hver getur sætt sig við það að bræður okkar og systur standi í biðröðum úti á götu eftir mat?

REYKJAVÍKURFRAMBOÐIÐ, ólíkt fjórflokknum, mun beita sér af alefli í samskiptum borgar og ríkis þannig að ekki halli stöðugt á borgarbúa, til dæmis varðandi skiptingu fjármagns til framkvæmda í heimabyggð.

Kjóstu með eigin hagsmunum - kjóstu REYKJAVÍKURFRAMBOÐIР 

Skattar verði ekki hækkaðir í Reykjavík

REYKJAVÍKURFRAMBOÐIÐ vill auka völd fólksins!

Ég veit það hreinlega ekki hvort að þinghald eigi að vera almennt opið eða lokað. Ég hef ekki tekið afstöðu til þess og tel það ekki augljóst. Gæti vel séð hvernig eðlilegt sé að það sé lokað til dæmis í tilfellum þar sem ákærði fer fram á það.

Aukið íbúalýðræði og bein þátttaka almennings er eitthvað sem að ég vil berjast fyrir. Það virðist oft þessa dagana sem að baráttan blandist mörgum hlutum og á mörgum stöðum. Kerfið berst á móti og höktir verulega. Kerfið vill að virðist ekki afhenda hluta af völdum sínum öðrum. Kerfið virðist gjarnan vera mest í því að viðhalda sjálfu sér.

Baráttan mín og ástríða fyrir breytingum er nú komin inn á sveitarstjórnarstigið. En þar er kerfið eins og annarsstaðar. Það vill aðkomu almennings sem minnsta. Þessu verður að breyta. Við verðum að berjast fyrir því að koma hér á virkara íbúalýðræði með beinni aðkomu fólksins að ákvörðunum. Á sveitarstjórnarstiginu á þetta augljóslega við um nær umhverfi til dæmis. Það þarf að koma á sjálfstæðum hverfaráðum, kjörnum af fólkinu í hverfinu, sem að hafa fjárhagslegt sjálfstæði og völd til ákvörðunartöku í eigin málefnum.

Kerfið er orðið að skrímsli sem við þurfum að hætta að fóðra.

 

Lokað þinghald kemur til álita

Sat oddvita fund í HR í hádeginu

Þetta var góður fundur þar sem að Jón Gnarr átti sviðið að sjálfsögðu. Hann hóf fundinn á því að lýsa því yfir að hann ætlaði að draga framboð sitt til baka en meðan að ég sat enn í geðshræringunni kallaði hann hátt og snjallt: "Djók".  Hann ætlar sér svo sannarlega að hafa þessa baráttu skemmtilega a.m.k. Það er ljóst og tókst vel til á þessum fundi.

En hér að neðan er kynningarpistillinn minn fyrir REYKJAVÍKURFRAMBOÐIÐ sem ég flutti í HR í dag.

----------------------------------------------------------------------------------------------------------------------

1. REYKJAVÍKURFRAMBOÐIÐ - Óháð framboð um hagsmuni Reykvíkinga.

Aftur og aftur horfum við upp á hagsmunum borgarbúa fórnað sem skiptimynt í valdabrölti fjórflokksins á landsvísu. Borgin hefur verið vanrækt vegna landsmála pólitíkur fjórflokksins og virðist oft sem kjörnir fulltrúar líti á störf í borginni sem æfingavöll og auglýsingu fyrir þingmennsku. Þetta hefur sýnt sig í málum eins og flugvallarmálinu og Sundarbraut svo aðeins tvö nærtæk dæmis séu tekin.

REYKJAVÍKURFRAMBOÐIÐ er framboð til þess að berjast fyrir Reykvíkinga. Við erum óháð og getum beitt okkur að fullu fyrir heimabyggð.

Rekstur borgarinnar á ekki að snúast um neitt annað en að veita borgarbúum þjónustu. Það er ekkert hægri og vinstri í því. Það eru landsmálastjórnmál.

2. Bætt skipulag - dregur úr umferð, fækkar slysum og minnkar mengun.

REYKJAVÍKURFRAMBOÐIÐ vill bæta skipulag borgarinnar og þétta byggð. Þétting byggðar eykur hagsæld borgarbúa og eykur lífsgæði. Það fjölgar nú með hverjum deginum þeim fjölskyldum sem aka yfir 100 km. á dag til að sinna erindum sínum í borginni, og það jafnvel á báðum heimilisbílunum. Þetta eykur umferð í borginni, sem þýðir aftur aukningu á slysum og mengun. Þá sparast fjölskyldum miklir fjármunir en samkvæmt tölum Félags Íslenskra Bifreiðaeigenda er kostnaður við rekstur einkabíls ekki undir 1,5 milljón á ári. Einnig er þetta skipulag allt of dýrt fyrir borgarsjóð.

Þessa stöðugu útþenslu borgarinnar verður að stöðva, endurskipulagningar er þörf.

REYKJAVÍKURFRAMBOÐIÐ vill að skipulögð verði falleg byggð í Vatnsmýri.

Vatnsmýrin er á tvöfaldri stærð á við Monaco í nálægð við falleg útivistasvæði eins og Öskjuhlíð, Nauthólsvík, Skerjafjörðinn, Tjörnina, Miðbæjinn og 2 háskóla. Þannig svæði hentar ungu fólki mun betur en byggð upp til heiða í 30 mínútna fjarlægð frá þjónustukjörnunum. Hvort viljum við frekar í framtíðinni búa á Hólmsheiði með flugvöll í Vatnsmýri eða búa í Vatnsmýri með flugvöll á Hólmsheiði.

Við þurfum að hugsa til framtíðar. Hún kemur.

3. Verjum velferðarkerfið - bætum þjónustu. Lausnin er í Vatnsmýrinni.

Um leið og Vatnsmýrin er skipulögð sem byggingasvæði þá verður hún verðmæti. Þar myndast yfir 70 milljarðar sem hægt er að nota á næstu árum til að byggja upp innviði borgarinnar og halda uppi allri þeirri þjónustu sem við þurfum á að halda án þess að skuldsetja borgarsjóð enn frekar eins og fjórflokkurinn vill.

Nú þegar er búið að skerða þjónustuna mikið og bitnar það sérstaklega á barnafjölskyldum.

REYKJAVÍKURFRAMBOÐIÐ vill

• Verja hagsmuni borgarbúa

• Bæta skipulag fyrir aukna hagsæld og

• Verja velferðarkerfið og bæta þjónustu

• Allt þetta ÁN skattahækkana því REYKJAVÍKURFRAMBOÐIÐ sér lausnina í Vatnsmýrinni

 

 

Jón Gnarr og Hanna Birna best

REYKJAVÍKURFRAMBOÐIÐ - Dreifum valdinu - Bætum skipulag - Verjum velferðarkerfið - Gerum þetta ÁN skattahækkana

Nýr raunverulegur valkostur fyrir Reykvíkinga í komandi sveitarstjórnarkosningum

1. Óháð framboð um hagsmuni Reykvíkinga – dreifum valdinu.
Aftur og aftur horfum við upp á okkar hagsmunum fórnað sem skiptimynt í valdabrölti fjórflokksins á landsvísu. Þá skín einnig í gegn að fjórflokkurinn hefur ekki minnsta áhuga á því að draga úr valdi sínu og dreifa því áfram til fólksins.
Á þessu verður að taka og leiðin til þess er að stofna til framboðs sem er óháð "þörfum" fjórflokksins og getur beitt sér að fullu fyrir hagsmunum heimabyggðar.
Við viljum dreifa valdinu til fólksins og leiðin að því er að koma á þriðja stjórnsýslustiginu í borginni í formi sjálfstæðra hverfaráða sem að yrði kosið í innan hverfis. Slík ráð þyrftu að vera fjárhags-lega sjálfstæð og fara með skipulagsmál og fleiri ákvarðanir sem fjölluðu um hverfið sem slíkt.

2. Bætt skipulag borgarinnar - dregur úr umferð, fækkar slysum og minnkar mengun.
Þétting byggðar eykur hagsæld borgarbúa. Það fjölgar nú með hverjum deginum þeim fjölskyldum sem aka yfir 100 km. á dag til að sinna erindum sínum í borginni, og það jafnvel á báðum heimilisbílunum. Þetta eykur umferð í borginni, sem þýðir aftur aukningu á slysum og mengun. Þá sparast fjölskyldum miklir fjármunir en samkvæmt tölum FÍB er kostnaður við rekstur einkabíls ekki mikið undir 1,5 milljónum á ári núna.

3. Verjum velferðarkerfið - bætum þjónustu. Lausnin er í Vatnsmýrinni.
Borgin býr yfir miklum verðmætum í Vatnsmýrinni og við teljum það ómögulegt að hunsa þau verðmæti og ætla í staðinn að auka enn frekar álögur á borgarbúa í skattheimtu og enn frekari niðurskurði í velferðarkerfinu. Enn frekari niðurskurður á leikskólum, frístundaheimilum og í

menntakerfinu þýðir að foreldrar þurfa að draga enn frekar úr vinnu til þess að geta verið heima fyrir og sinnt börnunum. Þetta þýðir enn frekari tekju-skerðingu og enn verri afkomu. Það er leið til þess að verja velferðarkerfið og bæta þjónustuna og hún liggur í Vatnsmýrinni. Með nýju skipulagi fyrir svæðið má strax í sumar veðsetja það hóflega og koma í veg fyrir að kreppan hafi enn meiri og verri áhrif á fólkið í borginni.

Hver vill ekki sjá biðraðir eftir matargjöfum upprættar?

Hvers vegna vill REYKJAVÍKURFRAMBOÐIÐ koma á þriðja stjórnsýslustiginu í borginni?

Dreifing valdsins er mikið hagsmunamál alls staðar í stjórnmálum í dag. Hálfgert einræði ríkir á mörgum stöðum. Þrískipting valdsins er í raun aðeins einskipting þar sem að framkvæmdavaldið ræður öllu og í borginni eru allar ákvarðanir teknar í borgarstjórn þar sem að hagsmunir stóru flokkanna á landsvísu virðast oft skipta meira máli en hagsmunir Reykvíkinga sem að þeir þó eiga að vera að berjast fyrir.

REYKJAVÍKURFRAMBOÐIÐ vill koma á þriðja stjórnsýslustiginu í borginni í formi sjálfbærra hverfisráða sem kosið er til innan hvers hverfis fyrir sig. Slík ráð myndu stýra því hvernig skipulag hverfisins þróast innan eigin hverfis þó að slíkt þyrfti eðlilega ávallt að vera í samstarfi við aðliggjandi hverfi þegar um útjaðar er að ræða. Eina leiðin til þess að íbúar hverfanna stýri eigin málum sjálfir er að koma á slíkum hverfaráðum sem að hafa sjálfstæðar fastar tekjur af útsvari hverfisins, til þess að nýta á þann máta sem þau sjálf kjósa.

Í dag er þetta ferli þannig að það er í raun ekkert sjálfstæði og íbúarnir eru alltaf undir duttlunga borgarstjórnar komnir með það hvort að einhverju fé verði veitt í þeirra nær umhverfi eður ei.

Dreifum valdinu - aukum lýðræðið