REYKJAVÍKURFRAMBOÐIÐ mælist með fylgi - afar ánægjuleg tíðindi

Já, þrátt fyrir að hafa ekkert getað komið okkur á framfæri enn sem komið er nema með einni auglýsingu í Fréttablaðinu og svo með bloggum mælist REYKJAVÍKURFRAMBOÐIÐ nú með 1,7% fylgi. Á sama tíma veit stærstur hluti Reykvíkinga ekki af okkur eða fyrir hvað við stöndum. Ég met þetta því sem afar ánægjuleg tíðindi og þakka stuðninginn.

Þetta eru afar undarlegir tímar í pólitík þessi dægrin og áhugi fólks á komandi sveitarstjórnarkosningum er nánast engin. Sú litla umræða sem skapast hefur er fyrst og fremst um Besta flokkinn og skemmtunina sem að Jón Gnarr hefur fært inn í kosningarnar undanfarna daga. Margir stjórnmálamenn tengdir fjórflokknum hafa lýst því yfir að þetta séu fyrst og fremst skilaboð um að þeir hafi sjálfir klikkað. Það er mikið til í því en mikil sjálfhverfa þó að mínu mati að eigna sjálfum sér fylgi Jóns Gnarr. Er ekki einfaldlega líklegt að hann hafi þó nokkuð fylgi líka vegna eigin vinsælda og framkomu? Mér þykir það líklegt.

Í þessum mælingum sem birst hafa að þessari síðustu undanskilinni var REYKJAVÍKURFRAMBOÐIÐ ekki orðið til. Við vonum að sjálfsögðu að fjölmargir kjósendur séu að bíða eftir því að sjá eitthvað nýtt, eitthvað alvöru mótvægi við fjórflokkinn stíga fram og ætlum að treysta á að kjósendur sjái að við höfum eitthvað raunverulegt fram að færa.

Við stöndum fyrir fjölmargt, en setjum fókusinn á þrjú meginþemu:

1. Að draga úr valdi og hagsmunatengslum fjórflokksins og auka lýðræði í borginni með því að færa völd frá borgarstjórn og borgarráði, til fólksins.

2. Að bæta verulega skipulag í borginni með þéttingu byggðar, en þétting byggðar dregur verulega úr óhagræði og umferð, sem aftur dregur verulega úr slysum og mengun.

3. Að verjast alfarið niðurskurði í velferðarkerfinu og hækkun skatta og lausnin er fyrir augum okkar allra í verðmætu landi Vatnsmýrarinnar.

Við trúum ekki á stórar yfirlýsingar og loforð, en viljum þó lofa því að fáum við til þess nægjanlegt fylgi og vægi innan borgarstjórnar munum við leggja fram lausnir sem bæta verulega hag þeirra sem verst hafa það í borginni. Það er með öllu ólíðandi að fólk skuli þurfa að standa í biðröðum eftir matargjöfum fyrir allra augum. Lágmarksviðmið fyrir framfærslu hjá félagsþjónustunni verða að hækka.

Með því mikla aðgengi að fjármagni sem leynist í Vatnsmýrinni eru allar líkur á því að við getum dregið mjög úr versnandi kreppuáhrifum og jafnvel komið alfarið í veg fyrir versta tímann sem áætlað er að sé framundan.

Lýkur kreppunni í borginni í sumar?

Besti flokkurinn fengi fjóra kjörna

REKJAVÍKURFRAMBOÐIÐ vill auka beint íbúalýðræði - völdin frá bákninu til fólksins

Þetta er afar gott framtak hjá Hönnu Birnu, að vissu leyti beint framhald af vinnu sem R-listinn hóf á sínum tíma þegar að það hóf starf við að koma á hverfaráðum um alla borgina.

Nú er staðan hins vegar þannig að hverfaráðin hafa lítil sem engin völd og eru ákvarðanir þeirra og niðurstöður í besta falli ráðgefandi í nánast öllum tilfellum. Þessu viljum við í Reykjavíkurframboðinu breyta og færa völdin yfir skipulagi hverfanna í ríkari mæli til íbúanna sjálfra. Líklega er besta leiðin til þess að gera hverfaráðin sjálfstæðar einingar fjárhagslega þar sem að einhver hluti útsvars úr tilteknu hverfi rennur beint í þeirra eigin sjóði til ráðstöfunar innan hverfisins.

Það verður að vinna gegn þessari hefð sem virðist vera svo algeng þar sem að grasrótin um alla borgina er orðin langþreytt og meðvirk gagnvart "yfirvaldinu". Hefð þar sem að grasrótin kýs um tiltekna hluti eða hefur ákveðinn vilja og borgaryfirvöld hunsa það algerlega. 

Fólkið á að ráða og það oftar en í kjörklefanum á fjögurra ára fresti. Fólkið á að hafa beina leið til virkrar þátttöku í ákvörðunum sem ná yfir þeirra hverfi.

Við erum á fullu að undirbúa framboðið og leitum að fúsum fótum til að starfa með okkur. Bæði sjálfboðaliða sem og fleiri frambjóðendur til að taka þátt. Stefnumálin okkar munu verða í mótun til 8. maí en þá ber okkur að skila þeim af okkur niðurnegldum til kjörstjórnar að mér skilst. Það er því tækifæri núna til þess að koma og starfa með okkur og hafa áhrif á hvaða áherslur og leiðir við förum í tilteknum stefnumálum.

Heimasíðan okkar á að birtast á hverri stundu núna skilst mér, en slóðin þangað er http://www.reykjavikurframbodid.is

Endilega slástu í hópinn með okkur 

Sérstakir hverfavefir opnaðir

Framhaldsstofnfundur REYKJAVÍKURFRAMBOÐSINS í kvöld klukkan 20:00

 Smelltu á myndina til að sjá hana skýra:

Vendum nú kvæði í kross, nú eru það borgarmálin - REYKJAVÍKURFRAMBOÐIÐ verður til

Nýtt framboð stígur nú fram í Reykjavík og mun taka þátt í komandi sveitarstjórnarkosningum, Reykjavíkurframboðið.

Við erum hópur fólks sem að finnst skelfilegt upp á að horfa að einu lausnirnar sem að eigi að bjóða okkur fjölskyldufólki í Reykjavík upp á á komandi kjörtímabili, séu skattahækkanir og mikil skerðing á þjónustu.

Borgin liggur á mikilli auðlind í landi Vatnsmýrar. Auðlind sem hæglega stendur undir því að bætt verði við í velferðarmálin og komið alfarið í veg fyrir skattahækkanir. Vegna mikilla tengsla fjórflokksins við landsbyggðina hafa fulltrúar þeirra í borginni að virðist ekki getu til þess að ganga í það að berjast fyrir hagsmunum borgarbúa af fullum krafti. Við teljum því fulla þörf á framboði sem ætlar að einbeita sér að eingöngu því, að berjast fyrir hagsmunum borgarbúa.

Hver vill ekki sjá bætta þjónustu í velferðarmálunum? Betri úrræði fyrir fólk í neyð? Það er ekki fólki bjóðandi að þurfa að standa í löngum biðröðum úti á götu, frammi fyrir öllum sem sjá vilja, og bíða eftir matargjöfum eða annarri slíkri aðstoð. Nú er það á okkar ábyrgð að stíga fram og standa saman um velferð okkar og barnanna okkar.

Það er opinn kynningarfundur fyrir framboðið klukkan 20:00 annað kvöld á 2. hæðinni í Iðnó.

Ég hvet þig eindregið til þess að mæta!

Reykjavíkurframboð býður fram í borginni

Ég var einn starfsmanna Sleðaleigunnar þarna í gær.

Vil byrja á því að þakka björgunarsveitarfólkinu sem þarna kom í gær innilega fyrir gott starf. Það var sambland góðs útbúnaðar og lukku sem þarna spilaði saman í gær og varð þess valdandi að ekki fór verr í þessu ömurlega óhappi. Konan brást sem betur fer við nákvæmlega eins og fyrir hana var lagt og umfram það jafnvel. Við leggjum á það mjög sterka áherslu við fólk sem fer þarna um með okkur að verði það af einhverjum ástæðum viðskila við hópinn, stöðvi það samstundis og bíði. Við þekkjum hvar við vorum á ferðinni og getum því rakið GPS ferilinn okkar til baka sömuleið og fundið viðkomandi. Fari fólk af stað getur tekið afar langan tíma að finna það. Konan brást algjörlega rétt við og umfram það, þegar að hún gerði þeim skjól úr vélsleðanum.

Ég tek heilshugar undir þau orð Sýslumanns að að sjálfsögðu ber að rannsaka þetta mál, eins og öll svona mál eru rannsökuð. Það er eðlilegt ferli máls og á að gera allt til að fá þetta á hreint.

En sem einn starfsmanna af vettvangi þarna í gær og vegna dómhörku bloggara heiman frá sér úr hlýjunni, vil ég koma eftirfarandi á framfæri.

Við allir sem þarna vorum að störfum í gær erum þaulreyndir jeppa- og sleðaleiðsögumenn á Langjökli. Við höfum allir mikla reynslu af störfum þarna, þekkjum landslag svæðisis mjög vel og að sama skapi hvernig veðrið þarna hagar sér almennt. Það var spáð sterkum blæstri á norðurlandi seinni partinn um daginn í gær morgun. Sterkur vindur á norðurlandi hefur almennt ekki stórkostleg áhrif á skyggni syðst á Langjökli nema að það sé þeim mun meiri vindstyrkur. En ef svo er að þá kemur það þar yfir mun seinna en það kemur yfir fyrir norðan. Skyggni var gott þegar við lögðum af stað og framan af. Þegar við sáum að það var að versna var hópnum samstundis snúið við og farið með þau niður að jökuljaðrinum þar sem veðrið var enn í besta lagi og heldur sér almennt mun betra skyggni þar í þessari vindátt. Það átti hins vegar því miður ekki við í gær og þetta ömurlega atvik átti sér stað þegar að skyggnið hvarf okkur þar algerlega líka.

Fyrir þá sem hafa gagnrýnt það að við höfum farið af stað og benda á að samkvæmt veðurspám hafi þetta verið fyrirsjáanlegt að þá vil ég upplýsa ykkur um það að við notumst almennt mest við veðurspár af norsku stofunni http://yr.no. Þetta gerum við vegna þess að reynslan okkar er að þeir hafa staðið sig mun betur í spám á þessu svæði heldur en íslenskar spár. Líklega fyrst og fremst vegna þess að þeir eru með fjöldamargar veðurstöðvar við jökulinn. Vegna reynslu okkar þar af notum við norsku veðurstofuna mun meira en þá íslensku. Það hins vegar brást því miður spáin þeirra í gær, en hún sagði í gærmorgun að vindurinn yrði mestur um 12 m/sekúndu á jöklinum þarna seinnipartinn í gær og þá verst norðan til. Miðað við okkar reynslu bendir það ekki til slæms skyggnis þarna sunnan til.

Við sem þarna störfum fast eða reglulega, höfum afar mikla reynslu af ferðum og aðstæðum um jökul. Eru flestir sem starfa við ferðaþjónustu þarna í föstu starfi, 5-6 daga í viku þarna upp frá og þekkja því aðstæður gríðarlega vel. Förum með hundruði manns á jökul þarna í hverri viku og er þetta fyrsta tilfelli sem upp kemur í yfir 20 ár, þrátt fyrir að veður geti verið afar misjöfn þarna uppfrá. Með hópnum í gær vorum við fjórir leiðsögumenn. Einn sem leiddi, ég aftastur þegar þarna var komið ogtveir til viðbótar sem fylgdu á hvorri hlið hópsins. Þegar veðrið fór að versna, var hópnum þjappað saman í að keyra 3-4 sleðar hlið við hlið til þess að fólk væri þétt saman og við hefðum betri yfirsýn yfir hópinn. Aðstæður urðu hins vegar því miður gríðarlega slæmar þarna og skyggnið þegar minnst nánast ekkert. Við gerðum okkar allra besta við skelfilega erfiðar aðstæður. Eftir á að hyggja er ekki gott að sjá að við hefðum getað brugðist betur við en stjórnendur hópsins fyrirlögðu, eftir að þetta ofsaveður skall svo skyndilega yfir þarna.

Þetta var ömurlegt óhapp í gær, en óhapp engu að síður. Enginn með reynslu af þessum aðstæðum, sá fyrir út frá aðstæðum eða veðurspám hvernig þarna yrði.

Ég þakka Guði fyrir hversu vel þetta fór. Ég veit sem er að aðstæður þarna í gær voru við upphaf ferða okkur ekki óeðlilegar eða forsjárverðar. En veðrið skall á mun harðar en við gátum gert okkur grein fyrir miðað við spár og okkar reynslu.

 

Sýslumaður rannsakar

Og svarið er 42 - gat varla orðið annað - en við þurfum nú að leggjast í vinnu við að finna réttu spurninguna

Það var skemmtileg ádeila sem birtist manni í bókinni "A Hitchhikers Guide To The Galaxy" sem ég las sem unglingur. Þar var sett fram saga af vísindamönnum, sem lögðu í mikla vinnu við að smíða súpertölvu, svo háþróaða að aldrei fyrr hefði neitt viðlíka verið til sem hugmynd, hvað þá meira. Súpertölvunni var ætlað aðeins eitt hlutverk, að svara spurningunni um tilgang lífsins.

Ég man ekki hversu lengi smíði tölvunnar átti að hafa staðið yfir samkvæmt bókinni, en man ekki betur en að það hafi verið a.m.k. nokkrar kynslóðir. En þegar að hún var loksins tilbúin, slógu menn inn spurninguna um hver væri tilgangur lífsins?  Svarið kom einhverjum kynslóðum síðar. "42"

Enginn þálifandi manneskja skyldi með nokkru móti svarið og því var farið af stað í vinnu við að komast að því hver væri rétta spurningin við svarið.

Nett ádeila um hugmyndaheim mannsins þarna á ferðinni.

Mér datt þessi saga hins vegar í hug í dag þegar að ég las niðurstöður Þjóðfundarins, sem haldinn var í Laugardagshöllinni í dag. Frábært og þarft framtak sem ber að hrósa. Niðurstaðan, eftir á að hyggja, gat hins vegar ekki orðið önnur að ég held. Niðurstaðan er einhver ljóðrænn fagurgali sem hljómar mjög í anda stefnuskráa stjórnmálahreyfinga og þá sérstaklega í aðdraganda kosninga.

Stefnuskrár stjórnmálahreyfingu eru jú einmitt consensus nokkur þúsund manns yfirleitt, niðurstaða umræðu þar sem búið er að brúa þau mismunandi sjónarmið sem fólkið þar innanborðs hefur og leggja fram yfirlýsingu, sem allir gátu verið sammála um.

Eitthvað mjög almennt orðað - eitthvað sem móðgar engan og ögrar engum.

En endilega, ekki skilja þetta sem svo að mér finnist þetta ekki vera frábært framtak og eiga mikið hrós skilið. Það var virkilega vel að öllu staðið, fundurinn rann afar smurt í gegn og umsjón öll með besta móti. Það er okkur öllum án nokkurs vafa afar hollt að setjast svona niður með reglulegum hætti og eiga samtal og rökræðu við þjóðar meðlimi. Rökræður til uppbyggingar eru eitthvað sem að við gætum án vafa lært mikið af frökkum um. Í stað þess að forðast þær, að upplýsa okkur og taka fullan þátt.

Nú er bara spurningin hvernig við munum sjá stjórnmálaflokkana pikka upp þessi hugtök öll á næstu dögum og gera sín. Það hefur verið venjan þegar að um er að ræða eitthvað sem skilgreint er sem vilji fólksins eða eitthvað sem er heitt þá stundina. Flokkarnir pikka það upp, þynna út og slá sér síðan á brjóst fyrir.

Nú er það okkar kæra þjóð að halda þeim vel við efnið áfram - VEL við efnið.

Og lausnin: Krafan um heiðarleika og önnur mannsæmandi gildi þarf að byrja á tiltekt heima hjá hverju og einu okkar.

Fólk logandi af áhuga

Í hvað á að ráðstafa þeirri auðlind sem orkan okkar er - eða því sem eftir er?

Nú birtist hver auglýsing á fætur annarri frá stóriðjufélögum og vinum þeirra um ágæti slíkra iðju. Nú síðast í Fbl í dag frá Norðuráli um ágæti álbræðslu starfsemi og hversu miklu hún skili til þjóðarinnar.  "Bullocks" myndi Scrooge segja og aldrei þessu vant myndi hann hafa rétt fyrir sér.
Tekjur af álbræðslu eru með því allra minnsta sem mögulega getur fengist per MW fyrir auðlindirnar okkar og ég hef fullan hug á því að setja í það vinnu í náinni framtíð að gera um það úttekt í hvaða hluti orkunni er best varið miðað við tekur per MW.

En hvaðan á orkan síðan að koma??  Sigmundur Einarsson á hér frábæran pistil um málið á Smugunni - skyldulesning allra með áhuga á framtíð þjóðar

http://www.smugan.is/pistlar/adsendar-greinar/nr/2503

Og lausnin? Jú, byrjum að nota réttar upplýstar tölur og upplýsingar til þess að vega og meta framtíð okkar. Ekki upphrópanir hagsmunaaðila.

Þann 11.11. klukkan 11 gerðist þetta 1918 - í dag er það Bloggheimur :)

 

Á þessum degi árið 1918:

World War I ends. Germany signs an armistice agreement with the Allies in a railroad car outside of Compiègne in France. The war officially stops at 11:00 (The eleventh hour of the eleventh day of the eleventh month) this is annually honoured with two-minutes of silence.

Ps. Sá þetta á Facebook

Nýr bloggvefur í loftið

Ingibjörg Sólrún Gísladóttir undirbýr endurkomu sína í stjórnmálin

Eða hvað? Ég yrði að minnsta kosti ekki undrandi eftir þessar fregnir.

En hvað er getur ISG gert til þess að losna undan þessari sjálfs ásökun sem er niðurrífandi og sjálfseyðandi?

Jú, uppgjörið sem gæti bjargað samvisku hennar felst í að stíga fram, segja satt og rétt frá því sem gerðist og gera allt sem í hennar valdi er fært til þess að bæta skaðann.

Allt annað er bara þvaður til þess gert að undirbúa jarðveginn fyrir endurkomu hennar í stjórnmálin, eða það sýnist mér.

Já, ég er að hugsa um að hætta þessu endalausa tuði hér á blogginu. Hér eftir (vonandi) mun ég ekki tuða án þess að færa fram lausn á sama tíma. Get ekki boðið mér og öðrum upp á meira niðurrif. Það er um allt í umræðunni hvort eð er, og hefur afar litlu breytt.

Ásakar sjálfa sig fyrir að hafa valdið reiði

Ríkið ætlar að tryggja lítilli fjölskyldu áframhaldandi einokun á matvörumarkaði - Samfylkingin grefur sér gröf

Þetta er vægast sagt ótrúleg staða sem upp er komin. Jón Ásgeir og félagar hafa öðrum fremur teflt hvað djarfast í fjárfestingum sínum og skuldsetningu. Félagarnir hafa fyrir allra augum notið þess verulega vel og borið mikið úr býtum, en eins og berlega hefur komið í ljós á undanförnum mánuðum - að mestu á kostnað þjóðarinnar allrar.

Hvað veldur því að Kaupþing ætlar nú að tryggja fölskyldunni sem búin er að kosta bæði bankann og þjóðina alla, gríðarlega fjármuni, áframhaldandi eign á Högum? Þetta ævintýri Jóns Ásgeirs er í heildina búið að kosta okkur væntanlega nú þegar hundruði milljarða, að ekki sé talað um hvað einokunar staða Haga á smásölumarkaði er búin að kosta þjóðina.

Ætlar ríkið nú að tryggja einokunina áfram? Á það ekki einmitt að vera hlutverk ríkisins að tryggja löglega eðlilega samkeppni? Að gæta þess að enginn hafi yfir 30% markaðshlutdeild? Að beita sér í gegnum samkeppniseftirlitið ef einhver fer yfir 30%?

Fyrirtækjastæða Haga er með yfir 60% markaðshlutdeild. 60%!!

Það þýðir að þeir stjórna alfarið verðlagningu á þeim markaði og það á öllum stigum. Bæði hjá birgjunum sínum sem og keppinautunum.

Þetta er ólíðandi ef að þessi samstarfssamningur fer í gegn. Verði þetta að veruleika mun ég reyna að finna mér vettvang einhversstaðar til þess að setja krafta mína í að berjast við þessa risa.

Vonum heitt og innilega að þetta séu aðeins vindmyllur Don Kíkóti.

Tugmilljarða afskriftir?