Ólög um greiðsluaðlögun samþykkt á Alþingi í gær - búa ráðamenn við varanlega afneitun á vandann?

Ráðamenn þjóðarinnar sjá fyrir sér að 100-200 manns þurfi aðstoð vegna greiðsluerfiðleika? Hversu veruleikafirrt getur þetta fólk verið? Búa þau í glerkassa án alls sambands við þjóðina?

Það eru tugþúsundir manna að minnsta kosti sem þurfa bráðaaðstoð, upphæðirnar kannski ekki alltaf stórar í viðmiði við heildina, en fólki engu að síður afar erfiðar. Ríkisstjórnin er jafn vanhæf í dag og hún var fyrir áramót. Það verður að vakna til lífsins í hvelli, við þurfum ráðamenn sem þora að horfast í augun við raunveruleikann. Ég minni enn og aftur á Borgarahreyfinguna. Við þorum og getum og erum laus við öll hagsmunatengsl við þá hópa sem sterkast standa gegn öllum breytingum. 

Hægt og rólega, já stundum reyndar afar hratt, erum við að fá að sjá betur og betur hverslags bull við höfum lifað við hérna heima. Skráð verðmæti eigna langstærsta hluta íslenskra félaga er verulega ofmetið og vandamálapakkinn sem við er að etja er þar með svo miklu miklu stærri en ráðamenn landsins eru að reikna með. Samt er þar á bæ enn verið að slökkva sinueldanna meðan að húsin okkar brenna.

Hagsmunasamtök heimlanna hafa verið afar dugleg undanfarið við að kynna sína baráttu og ég mæli eindregið með því að fólk kynni sér starfsemi þeirra til dæmis hér: http://www.heimilin.is/varnarthing/index.php

Á blaðamannafundi Borgarahreyfingarinnar í gær fengum við spurningu frá Hagsmunasamtökunum um það hvað við ætluðum okkur að gera í sambandi við vanda heimilanna. Við svöruðum þar skýrt með tilvísun í stefnumálin okkar sem má finna hér: http://www.borgarahreyfingin.is/stefnan/

En þar segir um aðgerðir í efnahagsvanda heimilanna:

Gripið verði þegar í stað til neyðarráðstafana í þágu heimila og fyrirtækja

1. Alvarleg skuldastaða heimilanna verði tafarlaust lagfærð með því að færa vísitölu verðtryggingar fram fyrir hrun hagkerfisins (til janúar 2008). Höfuðstóll og afborganir húsnæðislána lækki til samræmis við það. Raunvextir á verðtryggðum lánum verði að hámarki 2–3% og afborgunum af húsnæðislánum megi fresta um tvö ár með lengingu lána. Skuldabyrði heimila vegna gengistryggðra íbúðalána verði lagfærð í samræmi við verðtryggð íbúðalán. Í framhaldinu verði gert samkomulag við eigendur verðtryggðra húsnæðislána um að breyta þeim í skuldabréf með föstum vöxtum og verðtryggingarákvæði í lánasamningum verði afnumin.

2. Leitað verði leiða út úr myntvanda Íslands með myntbandalagi við aðrar þjóðir eða, ef þess þarf, einhliða upptöku annars gjaldmiðils.

3. Boðin verði víðtæk aðstoð við atvinnulausa um allt land með það að markmiði að aðstoða þá í að nýta atvinnuleysið sem tækifæri.

4. Skuldsett fyrirtæki verði boðin til sölu og tilboðum aðeins tekið ef ásættanlegt verð fæst. Annars verði starfsfólkinu leyft að taka yfir fyrirtæki. Skuldir eigenda verði ekki felldar niður sjálfkrafa en veita má hagstæð lán eða breyta skuldum lífvænlegra fyrirtækja í hlutafé í eigu ríkisins frekar en að afskrifa skuldir.

5. Halla á ríkissjóði verði mætt með endurskoðun skattkerfisins, m.a. með fjölgun skattþrepa, hátekjuskatti og breytingum á virðisaukaskatti, frekar en niðurskurði í heilbrigðis- og velferðarþjónustu. Alþjóðagjaldeyrissjóðurinn fái ekki að taka yfir stjórn á  landinu.

6. Strax verði hafist handa við að meta heildarskuldir þjóðarbúsins og að því loknu gert upp við lánardrottna eftir bestu getu. ICESAVE-reikningar Landsbankans og aðrar skuldir bankanna erlendis verði ekki greiddar fyrr en álit óháðra sérfræðinga liggur fyrir um skyldur Íslands, m.t.t. þess að sennilega hafi verið um svikamyllu að ræða en ekki eðlilega bankastarfsemi. Rannsakað verði hvað varð um allar færslur á reikningum bankanna erlendis sem og lánveitingar þeirra til tengdra aðila, fjármunirnir sóttir og þeim skilað til eigenda. Stjórnendur og eigendur bankanna verði gerðir ábyrgir fyrir því sem upp á vantar. Samið verður við grannþjóðirnar um það sem út af stendur m.t.t. neyðarástands efnahagsmála á Íslandi og reynt að fá þær skuldir niðurfelldar.  Samhliða því verði gefið loforð um að 2% af VLF Íslands renni til þróunaraðstoðar á ári í tíu ár til að sýna góðan vilja Íslendinga til að verða ábyrg þjóð meðal þjóða

Einnig svöruðum við því skýrt að við munum þegar í stað, fáum við til þess nægan stuðning þjóðarinnar, setja af stað aðgerðir sem miða að því að afnema verðtrygginguna á um 2 árum. Og það er ekki með neinum loðnum fyrirvörum eins og Steingrímur J. og Bjarni Ben. hafa viðhaft í sínum ummælum um verðtrygginguna.

Verðtrygginguna verður einfaldlega að afnema og það án meðvirkni gagnvart fjármagnseigendum.

Fjöldinn sem þarf greiðsluaðlögun vanmetinn

Athugasemdir

[EE elle (IP-tala skráð) 31.3.2009 kl. 21:00]

Já, bjargir ríkisvaldsins eru ónógar á meðan fólkið grætur og fjölskyldur flosna upp.  Og sumir flýja land.   Og bæði bílar og hús fólksins brenna.  Mér finnst líka vanta bílalán inn i nánast alla umræðu um skuldir heimilanna.  Það eru líka skuldir heimilanna.  Ekki bara húsin.

[Guðmundur St Ragnarsson, 31.3.2009 kl. 22:04]

Þessi s.k. "Skjaldborg" er komin fram. Hún var ætluð 100-200 heimili. Ég endurtek: eitthundrað - tvöhundruð heimili. Veruleikafirring fólks í fílabeinsturni. Minni á að þeir sem hafa verið í sjálfstæðum atvinnurekstri síðstu 3 ár fá enga hjálp í þessu greiðsluúrræði. Guð hjálpi þeim því ekki mun ríkisstjórnin gera það.

Kveðja,

Muggi.

[Páll A. Þorgeirsson (IP-tala skráð) 1.4.2009 kl. 11:27]

Á varla orð yfir þessi ósköp.  Ég gerði mér smá vonir þó "innst innra með mér" hafi ég sennilega aldrei haft trú á þessum ráðamönnum.

Ég er fer að hallast að því að það verði erfiðara að taka til eftir núverandi ráðamenn en "spillta bankamenn", því vandamálin geta orðið "óleysanleg" ef ekki er tekið á þeim svo vit sé í, strax í dag. 

[Sigríður Jósefsdóttir, 1.4.2009 kl. 13:17]

Baddi, Samfylkingin gerir ekkert sem kemur í veg fyrir að þau geti leitt okkur inn í ESB eins og lömb til slátrunar.  Viðvarandi 10-20% atvinnuleysi, og kreppa næstu 5 árin þar til hægt er að taka upp evru er það sem við skulum búa okkur undir haldi þessi ríkisstjórn áfram eftir kosningar.

[Arinbjörn Kúld, 1.4.2009 kl. 22:50]

Þetta er víst öll skjaldborgin.