Borgarahreyfingin - ein framboða - gefur það skýrt út að AGS á ekki að stýra hér ríkisfjármálunum

Þar sem Alþjóðagjaldeyrissjóðurinn stýrir málum til lengri tíma er alls staðar sömu sögu að segja. Gríðarlegur samdráttur í almanna kerfum, velferðarkerfi og menntakerfi í nafni sparnaðar. Samfélögin sem undir þá eru sett enda með afar litla opinbera þjónustu en engu að síður gríðarlega skuldsett. Svo skuldsett að á endanum missa þau frá sér auðlindir sínar að kröfu AGS, í hendur erlendra auðhringja.

Er það framtíðin sem þú vilt sjá hér heima?

Það einfaldlega verður að segja upp samningnum við AGS og endursemja um þá skilmála sem okkur eru settir. Samkvæmt því sem ég hef heyrt (væri þakklátur ef þú gætir sent mér tengil á þetta viðtal sem ég vísa til) var viðtal við ráðgjafa AGS í Financial Times einhvern tímann á nýliðnum vikum þar sem hann lýsti undrun sinni á því að við hefðum bara lagst flöt og samþykkt alla þeirra skilmála. Að sögn þessa rágjafa var það í fyrsta skipti sem hann mundir eftir, sem eitthvert ríki hefur samþykkt framsetta skilmála án samninga. Við sögðum bara já takk við þeim öllum algerlega laus við snefil af sjálfsvirðingu.

Finnst þér það ásættanlegt?

Flokkarnir (D og S) sem "sömdu" við AGS og flokkarnir sem nú viðhalda án athugasemda (S og V) þeim sama samningi eru augljóslega ekki að fara að breyta neinu þarna um.

Finnst þér það ásættanlegt?

Viljirðu sjá hér breytingar á hlutunum - frá sérhagsmunum til almannahags - þá þarf augljóslega að koma til eitthvað nýtt, óháð og óspillt afl til verksins.

Borgarahreyfingin er tilbúin til þess að taka til óspilltra málanna.

Lánið væntanlegt eftir fund AGS

Athugasemdir

[Vilhjálmur Þorsteinsson, 17.4.2009 kl. 17:30]

Við færum nú fyrst á hausinn, og krónan í frjálst fall, ef við hættum samstarfi við AGS.

Hér er fín samantekt á samstarfinu við AGS eftir Þórunni Sveinbjarnardóttur, þar sem m.a. kemur fram að engir leyniskilmálar eru fyrir hendi.

[Ragnar Eiriksson (IP-tala skráð) 17.4.2009 kl. 17:38]

Ég held að fólk almennt vilji bara fá heiðarlegt fólk með fullu viti á þing en á því er allnokkur skortur!   Mér finnst hins vegar slæmt þegar þið sláið um ykkur með óstaðfestum fregnum og segist ekki vilja vinna með AGS - sem er þó skilyrði sem allar nágrannaþjóðir setja okkur sem grundvöll samvinnu.     Vafalaust má hnika einhverju í samningum en það væri núverandi stjórn (Steingrímur) búinn að reyna ef það skipti einhverju megin máli.    Málið er bara að koma sem flestum af þessu þjófaliði frá og láta ekki spillingardrulluna slettast á sig!     Svo er hægt að fara að gera eitthvað vitrænt með góðu fólki - þá fást e.t.v. nauðsynlegar upplýsingar og þarf ekki að byggj á "ég heyrði...." og "ég frétti....".

Gangi ykkur vel,

Ragnar         

[Baldvin Jónsson, 17.4.2009 kl. 18:16]

Vilhjálmur, það sem kemur þarna fram sem öll óvissan stendur einmitt um er nákvæmlega þetta sem Þórunn skrifar: "og áætlun um langtímaaðhald í ríkisfjármálum"

Það er nákvæmlega innan þessa óskýra ramma þar sem að AGS dregur blóðið úr íslensku velferðarkerfi.

[NL (IP-tala skráð) 17.4.2009 kl. 19:51]

Landið er því miður á hausnum og krónan kolfallin. AGS hefur eingöngu eftirlit með nauðasamningum landsins fyrir hönd kröfuhafa. Svona eins konar rekstrarlán. Óvissan um tekjurnar gerir þetta að enn einu gamblinu. Síðan kemur að lokum að skuldadögum.

[Vilhjálmur Þorsteinsson, 18.4.2009 kl. 02:07]

Baldvin, því miður hefðum við þurft að ná jafnvægi í ríkisfjármálum hvort sem AGS kom hér að málum eður ei.  Án samstarfs við AGS værum við enn ólíklegri en áður til að fá lán til að brúa fjárlagahalla.  Peningarnir verða að koma einhvers staðar frá.  Þannig að það er viss blekking að halda því fram að AGS krefjist niðurskurðar - hann hefði þurft að verða hvort sem er.

[Baldvin Jónsson, 18.4.2009 kl. 02:31]

Já Vilhjálmur, það sem við vísum til með okkar yfirlýsingum gagnvart samningum við AGS er að við viljum fá að setja okkar eigin skilyrði um hversu hratt verði farið í niðurskurðinn. Við verðum að taka okkur öll saman um að standa hér vörð um stoðkerfin okkar og auðlindir landsins, hvað sem verður.

[Þór Saari, 18.4.2009 kl. 10:28]

Áherslan á jafnvægi í ríkisfjármálum er komin frá AGS og þeirri ömurlegu staðreynd að núverandi og fyrrverandi ríkisstjórnir ætla að velta skuldum fjárglæframanna yfir á almenning. Það er einfaldlega hægt að nálgast þetta mál öðruvísi og semja við nágrannaþjóðirnar um það sem upp á vantar eftir að búið er að gera upp sakirnar við eigendur og stjórnendur bankanna.

Skilyrði nágrannaþjóðanna voru fyrst og fremst vegna þess að þau vildu ekki lána þáverandi stjórnvöldum (sem að hluta til eru enn við stjórn). Þetta mun hins vegar breytast ef það kemur skýrt fram í kosningunum að íslendingar sjálfir vilja breytingar. Með nýju fólki verður allur eftirleikurinn auðveldari og trúverðugleikinn endurheimtist miklu fyrr heldur en ef haldið er áfram á þeirri braut sem gerendur hrunsins lögðu sjálfir.

Menn þurfa einfaldlega að spyrja sig þessarar spuringar. Eru arkítektar og verktakar hrunsins líklegir til að nokkurn tíma endurheimta traust Íslands erlendis. Eru þeir sem nú halda á sömu verkfærum og fyrri stjórnvöld líkleg til að nokkurn tíma endurheimta traust Íslands erlendis. Er líklegt að uppbygging á gjörpilltum og ónýtum grunni leiði til nokkurs annars en annars hruns.

Þetta eru ekki flóknar spurningar, en það þarf smá kjark til að svara þeim rétt. Róttæk skynsemi er svarið og þar kemur stefna Borgarhreyfingarinnar til sem lausn. 

[assa (IP-tala skráð) 18.4.2009 kl. 11:44]

Mig langar að biðja þig Baldvin um að svara mér þar sem ég heyri að þú ert vel að þér í stefnu Borgarahreyfingarinnar. Ef Borgarahreyfingin kæmist til valda, mundi hún..

a) Hætta strax að borga skuldir landráðamanna okkar?   Og þannig bjarga íslendingum frá sulti og seyru ca næstu 100-200 ár.

B) Festa vísitölu lána við upphaf síðasta árs? Og þannig bjarga íslenskum heimilum og íslendingum frá landflótta.

Ég veit svarið við C) Borgarahreyfingin er hlynnt ESB og það er stór galli, en er samt ekki von til að hún myndi ekkert gera í þeim málum þar sem við erum hvort eð er ekki í þeirri aðstöðu að uppfylla þær kröfur sem gerðar eru til inngöngu þar?

D) Láta þá sem vísvitandi komu undan fé og fluttu úr landi svara til saka og dæma í þeim málum?

Mig vantar flokk sem hefur þessa sýn á málin og þá mun ég kjósa hann :)

Þakka þér fyrirfram Baldvin fyrir svörin :)

[Vilhjálmur Þorsteinsson, 18.4.2009 kl. 12:38]

Þór, þú talar um að "núverandi og fyrrverandi ríkisstjórnir ætl[i] að velta skuldum fjárglæframanna yfir á almenning".  Ég bendi á pistil minn "Við borgum ekki!" og velti fyrir mér hvað þú sért nákvæmlega að tala um í því sambandi.  Skuldir bankanna lenda ekki beint á almenningi, en margvíslegur kostnaður af hruninu, beinn og óbeinn, gerir það vitaskuld.  Það er hins vegar erfitt að sjá hvað er til ráða í því.